Sab ke sab waise hi hain abhi......


Atul Paul Posted: January 25 ,2014

 

Yaad hai uss restaurant main...

Tum hamesha ek hi table par

Baithne ki farmaayish karti thi....

Aur phir hum kuch lamhe baatein karte the...

 

Tum peeti thi hamesha...

Wahi fresh lime soda aur

Jhagarti thi mujhse ki hamesha..

Coffee hi kyu peeta hun main.....

 

 

Ussi table par hi to pehli baar..

Tumne halke se mere haath ko chuaa tha..

Phir muskuraa kar..jhijhak kar...

Fauran kheech liya tha pehle....

 

Main ab bhi kabhi kabhi....

Waheen jaata hun...

Wahi puraana waiter , Aasif...

Ab bhi muskura kar wahi table deta hai mujhe....

 

Iss baar jab main wahaa baitha...

Maazi main jee raha tha ....

Asif mere paas aaya....aur..

Dabdabaayi aankhon ke saath bolaa

 

Sahab, woh madam bhi kabhi kabhi...

Aati hain akele..aur isi table par baith kar...

Bass ek cup coffee pee kar...

Chup chaap chali jaati hain hamesha....

 

Ye soch kar main muskuraaya...

Mera fresh lime soda khatam ho chuka tha....

Aasif mujhse  tip nahi leta, aur main jaanta hun kyun....

Main phir muskuraa kar..bahar chalaa aaya....

 

Aasif, woh restataurant aur woh table..

Teeno jaante hain hamaari mohabbat ko.....

Aur hamaari tarah woh bhi Khaamoshi se....

Zindagi aur mohabbat ko samjhte hain...

 

Shayad koi puraana rishta hai....

Woh restaurant, wahaan par Aasif

Woh table ussi jagah..aur hamaari ulfat...

Sab ke sab waise hi hain abhi......





Related Stories

Designed By: Web Solution Centre